LIVE МЭДЭЭ
Монгол Улс болон Япон Улсын холбогдох яамд 2019 оны 4 дүгээр сарын 17-ны өдөр “Ур чадвартай ажиллах хүчний тогтолцооны зохистой ажиллагааны үндсэн хүрээг хэрэгжүүлэх хамтын ажиллагааны санамж бичиг”-ийг байгуулсан билээ. Уг санамж бичгийн 6 дугаар зүйлийн 6.1 хэсэгт Хөдөлмөр халамжийн үйлчилгээний ерөнхий газар (ХХҮЕГ) нь “Ур чадвартай ажилтан”-ыг илгээх үйл ажиллагааг зохион байгуулах, гүйцэтгэх чиг үүрэг хүлээнэ гэж заасан. Иймд, Япон хэлний сургалтын төвүүд, ХНХЯ-наас ур чадварын дадлагажигч илгээх тусгай зөвшөөрөл авсан газрууд болон бусад байгууллагууд ур чадварын ажилтан илгээх үйл ажиллагаанд оролцохгүй болохыг иргэдэд анхааруулж, энэхүү мэдэгдлээр дамжуулан хариуцлагатайгаар мэдэгдэж байна.
Япон Улсад “Ур чадварын ажилтан” илгээх тогтолцооны дагуу, ХХҮЕГ нь Япон хэлний JLPT шалгалтын N4 түвшин болон түүнээс дээш, JFT шалгалтын A2 түвшин болон түүнээс дээш түвшинг хангаж, Япон Улсын яам, агентлагын газраас зохион байгуулах ур чадварын шалгалтад тэнцсэн иргэдийн ажил хайгчийн бүртгэлийн ажлыг 2020 оны нэгдүгээр сард багтаан эхлүүлэх төлөвлөгөөтөй байна. Эдгээр шалгуурыг хангасан иргэд ХХҮЕГ-аас заасан хугацаанд ирж бүртгэл хийлгүүлэх ба бүртгэлийг эхлүүлэх тухай мэдээллийг жич байгууллагын цахим хуудсаар дамжуулан, олон нийтэд мэдээлэхийг анхаарна уу.
